山歌子一

 

曲時間

收錄時間

收錄比例

16'46"

04'28"

1/4

 

( 一 ) 三檨松樹透天庭 唔知奈樣結松仁, 世上男人千千萬 唔知奈介正真情。

( 二 ) 上塘魚子跳下塘 唔知奈塘水較涼, 按多阿哥般般好 唔知奈介情較長。

( 三 ) 老妹命歪著爛衫 無好人才奔哥貪, 老妹可比爛花缽 唔敢喊哥種牡丹。

( 四 ) 大樹倒忒有筍生 醜人戀哥有所差, 豆腐拿來沾糖食 雖然嘴甜心也淡。

( 五 ) 甘蔗好食目目甜 兩人有意正來行, 老妹靚醜哥看過 莫來日後多棄嫌。

( 六 ) 雙腳行到牡丹亭 花多葉少奈位尋, 同哥人生面唔熟 穿針少介引線人。

( 七 ) 古井肚裡種井蘭 看花容易採花難, 啞狗食飯單枝筷 想愛湊雙開口難。

( 八 ) 新做門板新門閂 兩人交情心愛專, 燈心造橋哥敢過 鐵打劍門涯敢鑽。

( 九 ) 碗公打忒利霜霜 阿哥敢做妹敢當, 龍船唔怕漂江水 飯撈唔怕滾飯湯。

( 十 ) 同哥來去拜神明 倆人咒誓愛有靈, 山上老虎眾人打 丟舊戀新過海沉。

( 十一 ) 新買葵扇畫麒麟 倆人講過千年情, 倆人來看海邊水 海中無水正斷情。

( 十二 ) 倆人交情就交情 交到海底行得人, 交到日頭西邊出 交到石頭蟲蛀心